داستان-ي احمد-ي حرامي

مئهران باهارلي

٢٠٠٨

كيتابين آدي احمد-ي حرامي اولسا دا؛ اونون آنا قونوسو، گول اندام آدلي اردملي، اؤزوئريلي، آلچاق كؤنوللو و عئيني حالدا سون درجه اوسلو و سويوق قانلي گنج بير قيزين باشيندان گئچه نلردير. اثر، گول اندام`ين وئردييي ياشام ساواشي، ايچ دونياسي، اوموت و قورخولاريندان كسيتلر و يانسيمالاردان اولوشور. دستان اؤزه لليكله گول اندام`ين چئوره سينده كي ارككلرله (آتاسي "شهنشاه"، اونو اؤلدورمه يه قالخيشان "احمد حرامي"، ياشاميني قورتاران "خوجا روستم" و اري "گول افروخ شاه") اولان ايليشگيلريني باشاريلي و اؤزگون بير شكيلده سرگيله يه بيلمه سي باخيميندان، اولدوقجا ايلگي چكيجي و ده يه رليدير.
سؤزوموز

"داستان-ي احمد-ي حرامي"

١٤-١٣ ميلادي يوزايل تورك قوشوغونون ان گؤزه ل ياپيتلاريندان بيري، "داستان-ي احمد-ي حرامي" آدلي منظوم حيكايه دير. بو ياپيتين بيرجه ال يازما نوسخه سيني، توركييه لي بيلگين احمد طلعت اوناي اورتايا چيخاريب ١٩٢٨ ايلينده گئنيش اؤن سؤز، سؤزلوك و آچيقلامالارلا يايينلاميشدير. قوشاق ايكينجي كز ١٩٧٨ ينجي ايلده آزربايجان جومهورييتينده (باكي، گنجليك نشريياتي) ا. اشرفلي طرفيندن، اؤن سؤز و آچيقلامالارلا نشر اولونموشدور. ال يازمانين باشلانقيج و سونو اكسيك اولدوغوندان دولايي، داستان-ي احمد-ي حرامي قوشاغينين كيمين طرفيندن يازيلديغي، اينديليك بيليم عالمينجه بيلينمه مكده دير. قوشار، ياپيتين متنينده ده كنديسي حاققيندا- اثري يازاركن ياشينين ايله رله دييي و ساچ-ساققالينين آغارديغيندان باشقا- هر هانسي بير بيلگي وئرمه ميشدير. آنجاق بو مثنوينين ايچه ريك (موحتوا) و بيچه م (اوسلوب) وارسيلليغي -آشاغيداكي ديزه لرده گؤروندويو كيمي- قوشارين باشقا ياپيتلارينين دا اولابيله جه ييني گؤسته رمكده دير:

يالواريش

گؤرون ايمدي منه نئتدي زمانا،
اليمي آلدي، اوش آتدي يابانا.
نه دير بونجا منه جؤور-و جفالار،
مگر کيم قهر اوچون بسله دي آنا؟
سوچوم نه دير، عجب نئتديم، نه قيلديم،
قارا باغريم منيم غرق اولدو قانا.
هنوز دخي قيزيل گول قونچاسيندان
آچيلمادان نه تئز دؤندو خزانا.
جفا ايميش بو دونيانين وفاسي
کي، مين ياخشي ايشي ده يمه ز يامانا.
گؤرون بو چرخ-ي گردونو کي، مني
ساپانا قويوبان آتدي يابانا.
ايلاهي، دوشموش احوالين بيله ن حاق،
سنه سيغينديم، ائي حه ييي-ي توانا.

"داستان-ي احمد-ي حرامي"، اسكي باتي اوغوز توركجه سي ايله قلمه آلينميش و بو آلانين گونوموزه اولاشميش ايلك مثنوي دستانلاريندان بيريدير. آزربايجان جومهورييتينده بو ديلي آزربايجانجا، توركييه ده ايسه اسكي آنادولو توركجه سي آدلانديريرلار. اويسا بو ديل، ١٣-١٦ يوز ايللري آراسيندا اورتا ايران، گونئي آزربايجان (ايران`ين قوزئي باتيسي)، قوزئي آزربايجان (گونئي قافقاز)، عيراق، سورييه، و آنادولونون گونئيي ايله دوغوسوندا قوللانيلميش اولان و توركييه توركجه سي ايله آزربايجان توركجه سينين ايلك دئوره سيني اولوشدوران اورتاق يازي ديليدير. دولاييسي ايله آشيري ميللي-يئره لچي دويقولار و يانليش آدلانديرمالارلا بو ديلي يالنيز آزربايجان`ا و يا يالنيز آنادولو`يا محدود ائتمك دوغرو دئييلدير. بيزجه بو ديلين ان اويقون آدي، "اسكي باتي اوغوزجاسي"دير.

داستان-ي احمد-ي حرامي، ١٦٣٢ ميصراعدان اولوشماقدادير. عروض وزنينين هزج بحرينده يالين و آيدين بير ديلده يازيلميش اولان ياپيت، خالق سؤزلو ادبيياتي ايله ايچ ايچه دير. قوشار بؤيوك اولاسيليقلا خالق آراسيندا داها اؤنجه وار اولان بير حيكايه ني نظمه چكميش و اونو آلتي اوتوروم (مجليس) بيچيمينده قورقولانديرميشدير.

داستان-ي احمد-ي حرامي ايچه ريك، ديل و بيچه م باخيملاريندان، كيتاب-ي دده قورقود گله نه يي ايله ياخيندان ايلگيليدير. بو ياپيتدا دا قادين ايگيت، ييلماز و ساواشچيدير، كؤتو گوجلره قارشي آلپجا و باهاديرليقلا ساواشيم ياپار. كيتابين آدي احمد-ي حرامي اولسا دا؛ اونون آنا قونوسو، گول اندام آدلي اردملي، اؤزوئريلي، آلچاق كؤنوللو و عئيني حالدا سون درجه اوسلو و سويوق قانلي گنج بير قيزين باشيندان گئچه نلردير. اثر، گول اندام`ين وئردييي ياشام ساواشي، ايچ دونياسي، اوموت و قورخولاريندان كسيتلر و يانسيمالاردان اولوشور. دستان اؤزه لليكله گول اندام`ين چئوره سينده كي ارككلرله (آتاسي "شهنشاه"، اونو اؤلدورمه يه قالخيشان "احمد حرامي"، ياشاميني قورتاران "خوجا روستم" و اري "گول افروخ شاه") اولان ايليشگيلريني باشاريلي و اؤزگون بير شكيلده سرگيله يه بيلمه سي باخيميندان، اولدوقجا ايلگي چكيجي و ده يه رليدير.

آشاغيدا بو قوشاغين بوتؤو متني وئريلميشدير. متين باشدان سونا سؤزوموز فونئتيك يازيمي اساسيندا و يئنيدن يازيلميشدير. كلمه لرين يازيليشيندا سس اويومو قوراللاري تيتيزليكله گؤزه تيلميشدير ("اوموزينه" يئرينه "اوموزونا"، ....). چوخونلوقلا گونوموزده ايشله ديله ن كلمه لرين، بوگونكو بيچيمي يئيله نميشدير. ("كيبي"، "بن"، "گز"، "دليم" ... يئرينه "كيمي"، "من"، "كز"، "تليم"، .....). متنده وزني قوروماق اوچون آرتيرديغيم كلمه لر "[ ]" ايچينده وئريلميش، دوزگون اوخونوش و يا آنلاملاري قوشقولو اولان كلمه لرين قارشيسيندا "[؟]" اكله نميش، و وار اولان كلمه لرين يئرينه منيم اؤنه رديكلريم ايسه "قول [قوش؟]" بيچيمينده گؤسته ريلميشدير.

مئهران باهارلي

گئرچه يه هو!!!

داستان-ي احمد-ي حرامي

بو دستاني بو گون بونياد ائده ليم،
حاق`ين قودرتلرين بيز ياد ائده ليم.
گلين، ائي معني بحرين سئير ائده نلر،
بو دريا گؤوهريندن خئير ائده نلر.
معانيده قيلي ايکي بيچه نلر،
ديليندن داييما گؤوهر ساچانلار.
گلين، باري بوگون صؤحبت قيلاليم،
معاني کانينين دوررون بولاليم.
او`نون بيرليييني ذيکر ائيله يه ديل،
خاطيردا قالمايا ذرره جه موشکول.
زيرا کيم ديللري سؤيله ده ن اول`دور،
او`نون حيکمتلري قوللارا بولدور.
او`نون حيکمتلرينه عقل اريشمه ز،
ايشينه کيمسه نه هرگيز قاريشماز.
او`نون کئيفييتي بيلينمه دي هئچ،
مکاني قاندادير، بولونمادي هئچ.
نه ظاهيردير او کيم، گؤزدن ايرالماز،
نه باطيندير او کيم، هرگيز گؤرولمه ز.
او`نون اوولينين اؤنو بيلينمه ز،
او`نون آخيرينين سونو بولونماز.
نه ديليم وار او`نو شرح ائيله يه م من
نه بيليم وار کي، شرحين سؤيله يه م من.
او`نون ديل ذيکريني ائتمک گره کدير،
او`نون دوغرو يولون گئتمک گره کدير.
اوزوم قارا، سؤزوم قيسسا، سوچوم بول،
بئليم اه يري، يولوم دوغرو، بويوم سول.
شاشي باخديم، جودا دوشدوم من او`ندان
منيم حاليم نئجه اولوسار او`ندان.
قووا-قووا كؤنول دونيايا اردي،
عؤمور گئچدي، ساقال-و ساچ آغاردي.
عبث يئرلرده خرج ائتديم ياشيم من،
يئريدير داشلارا دؤيسه م باشيم من.
همين واردير اومودوموز صفادان،
مگر مدد اريشه موصطافا`دان.
اومودوموز ايکي عالمده اول`دور،
او`نون شفقتلري قوللارا بولدور.
توکه لي انبييا "نفسي" دئييسه ر،
او اوممتلرينين قئيدين يئييسه ر.
سالام اولسون او`نون يارانلارينا،
مودام رحمت اريشسين جانلارينا.
ابوبکير، عؤمه ر، عوثمان، علي`دير،
اييي ديرليکليدير بونلار، وليدير.
. . . . . . . . . . . . . . . . . . . . . . . .
. . . . . . . . . . . . . . . . . . . . . . . .
بولار توتماديلار کيبر-و کينايت
بولار بيلدي نه دير دين-و دييانت.
صفا خاطيرلر ايچينده کين اولماز،
کين اولدوغو كؤنوللرده دين اولماز.
سوره ليم كؤنلوموزدن کيبر-و کيني،
ييخارلار کيبر ائده نلر مولک-ي ديني.
گل ايندي موصطافا`يا وئر صالاوات،
دئيه ليم نئجه دير آنلا حيکايات.
ائشيت گل بير حرامي`نين سؤزونو،
اگر گؤرور ايسه ن معني اوزونو.
اولورسا حاق تعالا`دان عينايت،
قيلام بو قيصصه يي بير بير حيکايت.

مجليس – 1

مگر کيم اول زاماندا بير حرامي،
دريب دؤوشورموش ايدي چوخ حرامي.
اؤزو گوربوزدورور، ياولاق باهادير،
باهاديرليق يولوندا کئي باهادير.
بيليردي سئحر عئلميندن به غايت،
نوجوم عئلمينده ده قاديردي غايت.
گر افسون اوخويوب بير کز اوره يدي
اولوق دم آيي گؤيدن انديره يدي.
علي بو سينا عئلميندن بيليردي،
شهاب الددين`ه اول خيدمت قيليردي.
قيليج چالسا مين اره تپينه يدي،
قاغان آسلان کيمي کيم چاپينايدي.
دئميشلر آدينا احمد حرامي،
چاوي دولموش ايدي ائللر تامامي.
دوقوز کيشي اونون يولداشلارييدي،
دون-و گوندوز بيله حالداشلارييدي.
ايگيت گوربوزلر ايدي اول اره نلر،
اولاري قان قاشانيردي گؤره نلر.
دوراق ائديبديلر بير سارپ آرايي،
اولاري کيمسه وارمايا آرايي.
اول آرادان يولو کسميشلر ايدي،
ائي [؟] نئچه قافيله باسميشلار ايدي.
تليم مال ييغلاديلار [ييغيلديلار؟] اوندا اولار،
حئسابي يوخ قوماش-و سيم-و زرلر.
گئجه گوندوز شيکار ائده رلر ايدي،
گئري اول قالايا گيره رلر ايدي.
بولارين چاوي دوشدو روم`ا، شام`ا،
کيمه.سنه وارماز اولدو اول مقاما.
چون اون کيشي بو حالي بؤيله گؤردو،
دانيشيق ائتدي، بير-بيرله اوتوردو.
دئدي احمد حرامي: ائي يارانلار،
من ائشيتديم کي، باغداد`ي گؤره نلر.
اونون سولطانين انگين [زنگين؟] سؤيله ديلر،
اونون مالين قاتي وصف ائيله ديلر.
گلين، بوندان انه ليم باغ[ي]داد`ه
شيکار ائده-و کئي آرقون آو ائده.
اؤزوموز شهر ايچينده گيزله يه ليم،
او شاهين خزنه سيني گؤزله يه ليم.
کيم اول سولطانين آدييميش شهنشاه
ايکه ن چوخ مالي وارميش، اولدوم آگاه.
کيليدين آچاليم، مالين آلاليم،
جاهاندا بيز اونا بير ايش قيلاليم.
منيم هر يئرده افسونوم يازيلير،
کيليدلر آچيلير، قاپي پوزولور.
نه دورورسوز، دورون، بير بير قوشانين،
نه قاييرين، نه قورخون، نه اوشه نين.
آديدير دونيادا قالان کيشينين،
اگر ارکک اولا و گر ديشينين.
بولار دورو گليب دئدي کي سرور،
جان اوستونه نه دئرسه ن، ائي ديلاور.
خزينه قاپيسين برکيتديلر خوش،
توتوب باغداد يولونو گئتديلر خوش.
دونو گونه قاتيب بولار چو گئتدي،
بئش اون گونده بولار باغداد`ا يئتدي.
بير اودا توتدولار شهرين اوجوندا،
ايکه ن آزاده-و قاوقا يوخ اوندا.
گونوزون اؤزلرين گيزله رلر ايدي،
دون اولسا يوللارين گؤزله رلر ايدي.
خزينه قانداليغين بيلدي بونلار،
قولاي يول نرده ايسه بولدو بونلار.
اوتوردو اول گئجه بونلار دانيشدي،
قاچان کيم دونون ايکي بخشي گئچدي.
يئريندن دوردو اول احمد حرامي
بيله يارانلاري دوپدوز تامامي.
جبه، جؤوشن، سيلاحي گئيدي اونلار،
غزا يولونا قويوب باش-و جانلار.
خزينه دن يانا عزم ائتديلر چون،
کميندن چيخيب انيب گئتديلر دون.
گئده رکن ارديلر بير خوش آرايا،
ايکه ن گؤيچه ک ياپيلميش بير سارايا.
اوجا، مؤحکم، لطيف کئي خوش ياپيلميش،
زئهي مئعمار اونو آرسته قيلميش.
فوسونکاري ياپيلميش اوندا هر داش
قيزيل آلتين سيوايلا خوش مونققش.
مگر سولطان قيزي، اول خوب ديلارام،
گئجه گوندوز قيليردي اوندا آرام.
به غايت خوب ايدي اول شاه-ي شنگول
اوزو گول، سؤزو بولبول، ساچي سونبول.
گول اندام ايدي اول، نيگارين آدي،
شکردن شيرين ايدي سؤزو دادي.
اوتانير اينجي، ديشي دانه سيندن،
صدف، آغزينداکي دور دانه سيندن.
گوموشدور، تازه بوين بيللوره بنزه ر،
ايکي جادو گؤزو سححاره بنزه ر.
اونون کيمي کيمه سنه گؤرمه ميشدي،
اونو گؤره ن نيشانين وئرمه ميشدي.
ياناردي شمعداني ايلينده،
يازاردي خط رقم [قلم؟] توتموش الينده.
ديواني خط ايچينده سئحر ائده ردي،
او خط ايچينده يعني مئهر [؟] ائده ردي.
چيراق شؤوقو قامو پنجره لردن
ساچاردي شؤعله سين هر آرالاردان.
نه يئرده ايسه اود، پونهان دئييلدير
بولار گيزله نمه يه ايمکان دئييلدير.
حراميلر چون اول اودو گؤرورلر
دانيشيبان اول آرادا دورورلار.
دئدي احمد حرامي: من واراييم،
کيمه.سنه وار مي بو کؤشکده گؤره ييم.
کمند آتدي، يوخاري چيخدي اول دم،
گؤرور کيم اوتورور بير خوب-ي عالم.
قلم الده يازار يازي، اوتورموش،
اوزوندن گون کيمي بورقا گؤتورموش.
قاچان کيم قيزي گؤردو، دؤندو گئتدي،
يئنه يولداشلاري قاتينا يئتدي.
قيزي اول وورمادي هرگيز محاله،
يئتيشمه دي اونون فيکري بو حاله.
دئدي: يورون گئده ليم، کيمسه يوخدور،
بيلين کيم فتحيميز بو يولدا چوخدور.
ووروبان لافي بونلار تدبير ائتدي،
ائشيت تقدير ايشي اونلارا نئتدي.
روان-و چوست آرادان گئتديلر[دي]،
خزينه دن يانا عزم ائتديلر[دي].
گول اندام سؤزلريني دويموش ايدي،
اليندن قلميني قويموش ايدي.
شولوق دم پنجره ديبينه واردي،
کمند بيگي اه ييلدي، باخدي، گؤردو.
گؤرور اون کيشي قاتيراق گئده رلر،
خزينه دن يانا عزيم ائده رلر.
دئدي: بونلار اگر بيزدن اولايدي،
بو واختين قانجاري سئيران قيلايدي.
مگر بو کيشيلر خيرسيز مي اولا،
اونون اوچون دوشوب گئده ر بو يولا؟
شو گنج آسلان کيمي خوب-ي زمانه،
قاقيدي خشم ايله، اولدو ديوانه.
شولوق دم بئلينه قيليج قوشاندي،
بولاردان قورخدو و نه هئچ اوشه ندي.
بولار چون خزنه قاپيسينا يئتدي،
يانينجا بونلارين سؤيله يه [؟] گئتدي.
بير افسون اوخودو احمد حرامي،
خزينه اينله دي، دوشدو تامامي.
توکه لي چونکو آچيلدي قاپيلار
اوتالي-اوتالي چون گئتدي بولار.
تاش ائشيکده قرار ائتدي نيگارين
پناه ائتدي، نه دير گؤر اينتيظارين.
يالين ائيله دي اول هيندي قيليجي،
گؤرون نه قيلير اول فيتنه قيليجي.

گله ليم بيز حراميلر سؤزونه،
بيله سيز اونلارين فيکري، سؤزو نه؟
خزينه يه بولار کيم گيرديلردي،
قوماش، آلتين-و آقجا آلديلاردي.
گؤهر، اينجي، عقيق، لعل–ي بدخشان،
قيزيل، آلتين، جواهير، دورر-و مرجان.
هزاران لؤون-لؤون الوانلي داشلار،
حئسابسيز دخي آلتين-و گوموشلر.
گره يينجه بولاردان آلديلاردي،
گئري گئتمه يه نييت قيلديلاردي.
سؤزه گلدي، دئدي احمد حرامي:
قيلين بير دم، ائ يولداشلار، آرامي.
دورون بير دانيشيق وار ائيله يه ليم،
ايشيميزين سونونو سؤيله يه ليم.
نه وار تانري بير ايسه، ايش ايکيدير،
اؤلوم دئديکلري سانما ايکيدير.
مبادا ايزيميز دويولموش اولا،
يولوموز دؤرد يانا قاپلانميش اولا.
اول اوجدان منزيله ارمه يه ووز [بيز]
اؤگوموز، اوسوموز درمه يه ووز [بيز].
نيشانيم دپره نير تکين دئييلدير،
بوگون دامارلاريم ساکين دئييلدير.
بيرين-بيرين چيخين تاشرا وارينيز
اولون حاضير، يولونوزو گؤرونوز.
اوچونوز، دؤردونوز تاشرا وارينجا،
بو ايش معلوم اولور بير دم دورونجا.
هم آدم سسينه وورون قولاغي
گؤزه ديبه ن قيلين حاضير ياراغي.
اونون کيمي اولورسا، يوغورون [يوگورون؟] تئز،
منه تئزجه ک گلين، خبر وئرين تئز.
حذر ائيله يه ليم بيز اول ياغيدان،
منه¬ م گوربوز ياغيلاري داغيدان.
منيم نعرمه کيمسه دورماز ايردي،
نئچه کيشي اونومدن جاني وئردي.
بولار گرچي ايشي تدبير ائتدي،
خودا گؤر کيم نئجه تقدير ائتدي.
همن اول بيريسينه کيم بويوردو،
اوزون قاييرمادي، قاپييا سوردو.
قاپينين ايکيسين چيخدي، اه ييلدي،
همن تاش قاپيدا عؤمرو داغيلدي.
باشين چيخاردي، کيم باخايدي اوندان،
بوغازيندان چالار اول گول-ي خندان.
فلک پئيمانه سين اول دمده ايچدي،
باشي وورولدو اونون، تاشرا دوشدو.
بيري دخي اريشدي اول شارابا،
نه شارابدير، عؤمور وئردي خارابا.
ماجال وئرمه دي اونو، دخي چالدي،
همن دم گؤوده سيندن باشين آلدي.
قيلينج ايله چون اونو دخي ييخدي،
سورودو گؤوده سين تاشرا بيراخدي.
ده يه ر نؤوبت يئنه اونون بيرينه،
وارير اول دخي اونلارين يئرينه.
هله نه سؤز اوزاداييم، ائ سرور،
دوقوزونون باشين کسدي او ديلبر.
همن احمد حرامي قالدي اوندا،
قالاني غرق اولوب ياتيردي قاندا.
بو کز اول دخي قاپييا يورودو،
قالاني يولداشلارين تاشدا سانيردي.
قاپينين ايکيسين فيلحال چيخدي،
اريشدي، تاش قاپيدان تاشرا باخدي.
باشين گؤسته ردي يئنه، چکميش اولدو،
گول اندام ايومک ايله اونو چالدي.
تپه سينين ساچيني، دريسييله
قيليج يئره بيراخدي سيله-سيله.
يئنه قالديردي قيليجيني، چالدي
چالامادي، يوغوردو، تاشرا گلدي.
اليندن قورتولور احمد حرامي
گؤرور يولداشلاري دوپدوز تامامي.
نظر قيلدي قيزا، گؤردو کي، قيزدي،
سارايدا گؤردويودور، بيلدي، سئزدي.
آيتدي کيم، ائ قيز، ائتدين منه سن،
اگر اؤلمه ز ايسه م ائده م سنه من.
همن بونو دئدي و دؤندو گئتدي
گئري، گلدييي يولا عزم ائتدي.

گول اندام دنگ اولوبان باتدي فيکره،
حاق`ا اوز توتدو، مشغول اولدو ذيکره.
تعججوب ائيله دي، بو ايشي گؤردو،
دون ايچينده عجاييب سيرره اردي.
دئدي کيم، ائي کريم، قودرت سنيندير،
تعالاللاه، قامو حيکمت سنيندير.
قيليجيني سيليب قينينا قاتدي،
سارايينا گليبه ن گيردي ياتدي.
او گئجه صوبحه تکين قيلدي تشويش،
عجاييب حال ايدي دئر بو اولان ايش.
گئچيب اول دون يئنه چون اولدو گوندوز،
نور ايله دولدو عالم اوزو دوپدوز.
قاچان خورشيد کي، مشريقدن گؤروندو،
اولو داغلار قامو نور تاج ووروندو.
نورا باتدي قامو باشدان-باشا دک
بو جومله نه کي، قورودان ياشا دک.
يئنه جونبوشده اولدو خالق-ي علم
قامو وحش-و طويور-و جينن-و آدم.
خزينه دار دخي خزنه يه واردي،
نظر قيلدي نه آدام کي، نه گؤردو.
قاپيسي خزنه نين گؤردو آچيلميش،
گوموش آلتين کي، يوللارا ساچيلميش.
دوقوز کيشي ياتير باشي کسيلميش،
قيليجلاري سينيب، يايي ياسيلميش.
چو گؤردو بونلاري، اول دوردو گئتدي،
شهنشاه حضرتينه اردي، يئتدي.
دئدي بير-بير: نئجه گؤردويسه حالي،
شهنشاه تانلادي ايشبو خيالي.
دئدي وزيرلره: دورون واراليم
نئجه حالدير، نه باشلاردير گؤره ليم.
آليب وزيرلريني گلدي سولطان،
بولاري گؤردو، تانا قالدي سولطان.
خزينه دار مالي دردي و بولادي [بولدو؟]،
گئري يئرلي يئرينجه شوکرو قيلدي.
دوروست گلدي ماليم، هرگيز کمي يوخ،
قامو يئرلي يئرينجه، اسکييي يوخ.
اونو گؤردو يئنه سولطان، آچيلدي،
اوره يي تازه له ندي، سو ساچيلدي.
بويوردو قيغيرين ائلده و شرده
بولون، ايسته ن، آران اغيار-و ياردا.
منه بونون کيمي لوطف ايشله يه ن کيم
بو دنلي خزنه يي باغيشلايان کيم.
نه کيشيدير، گتيرينيز گؤره ييم،
نه دنلي مال ديله ر ايسه وئره ييم.
آچيلدي خالق ايچينده ايشبو دفتر،
اوخوندو، خالق-ي عالم قيلدي ازبر.
بولونمادي، بيلينمه دي بو موشکول
کي، هرگيز حلل اولونمادي بو موشکول.
گول اندام کيمسه يه سؤيله مه دي هئچ
بو رازي خالقا فاش ائيله مه دي هئچ.
ايکينجي مجليسه آغاز ائده ليم،
يئنه احمد حرامي`يه گئده ليم.

مجليس – 2

قاچان کيم اول زخ[ي]ملي اولدو، قاچدي،
نئچه داغلار، نئچه صحرالار آشدي.
دونو گونه اولاييبان گئده ردي،
آنيب يولداشلاريني آه ائده ردي.
دئر ايدي: قاني سئوگيلي يارانلار،
نر آسلان کيمي اول گوربوز اره نلر.
اليمدن غافيلين چيخدي، نئده يين،
آواره اولدوم، اوش قاندا گئده يين.
بير-ايکي گون قرار ائتدي، اوتوردو،
گؤرون فيکرينده نه نسنه بيتيردي.
روان يئنه يئريندن اورو دوردو،
ساتين آلدي و اون آتلار گتيردي.
مالين، گنجين توکه لي اوندا دردي،
او آتلار اوستونه جومله سين ووردو.
بزيرگان شکلينه دوزدو اؤزونو،
قيريم`ا عزم ائديپ توتتو اوزونو.
قوماش دوزدو قيريم`دا تورلو، الوان،
نه تورلو حييله ائده ر اول ناتوان.
تليم اوغلانلار آلدي آي صورتلي،
گؤزو نرگيز، اوزو گول، باي سيرتلي.
دخي آلدي قيز اوغلانلار، خلاييق
سانير حوري گؤره ن بونلاري باييق.
ياراغين دوزدو، قوشدو اول حرامي
قيريم`دا قالمادي آيريق آرامي.
يئنه باغداد ساري اولدو روانه
قولاق وور بيللاهي بو داسيتانه.

دونو گونه اولاييبان گئده ردي،
بولام مي قيزي دئيه فيکر ائده ردي.
مگر بير گون گؤروندو شهر-ي باغداد
گئده ردي قايقيسين، اولدو كؤنول شاد.
گلينجه خوجالار چاوين ائشيتدي،
قامو آتلاندي، اونا قارشي گئتدي.
ايراقدان باخديلار، بير توز گؤروندو،
هاوانين اوزو توز ايله بوروندو.
دئديلر کيم، بو نه چوخلوق کيشيدير،
بزيرگانليق چئرينين نه ايشيدير؟
مگر کيم بو بير ايقليمين به ييدير،
سانيرميسيز بونو بيزيم بيگيدير.
آتين کيشنه مه سي و چان آوازي
دولو اولموش ايدي اول اولو يازي.
خوجالار اندي(لر) آتلي آتيندان
کي، بونونلا گؤروشمک نييتيندن.
بولارين خاطيرييچون اول دا اندي،
گؤروشدو تئز، گئري آتينا ميندي.
قيليب موروت خوجايي گتيريبه ن
قاموسو اونا قوللوق يئتيريبه ن
گئچيب احمد بيييق بوردو، اوتوردو،
اوخودو اولولاريني گتيردي.
او شهرين کتخوداسي دخي بيله
بئزئستان کتخوداسي اونون ايله.
اليني آلدي اونلارين، گتيردي،
ديل آچدي سؤيله دي، پرده گؤتوردو.
شهه ر کتخوداسينا دئر، بيليروه ن،
اؤزون ياخشي کيشي دؤولت اولوروه ن.
گتيرديم آرماغانلار خان`ا ياخشي،
بولار [اول] پاديشاه`ين دورور بخشي.
دانيشيق ائيله يه ليم شاه ايله بيز
يامانلامان، بيزي بيليشديرين سيز.
يئدي اوغلان گتيرديم آيدان آري،
اوزو گولدور، شکردير آغزي ياري.
يئدي دخي قيز اوغلانلار آي اوزلو،
ديني [ديشي؟] اينجي کيمي، گول شهد سؤزلو.
يئدي هيندي قيليج، يئدي گؤزه ل آت،
يوگورسه ائيله يه قارلانقيجي مات.
هم اوچ گؤوهر گتيرميشه م دخي اوش
قبول ائتسين کي، كؤنلوموز اولا خوش.
صاباحين خان`ا سنينله واراليم،
موبارک اوزونو خان`ين گؤره ليم.
آيتدي کتخودا دانلا گله يين،
تاپين نه کيم بويورورسا قيلايين.
پيشيردي خوش طاعاملار، هم بويوردو،
قونوقلوق ائتدي، اونلاري دويوردو.
ايچيلدي شربت اوندا، يئندي چون خون،
اولولارا گئييردي خلعت-و دون.
چون آخشام اريشيبه ن، گون تولوندو،
قامو داغلار باشي ياوي قيليندي.
گؤيون اوزونه اولدوزلار ساچيلدي،
دانا ياخين يئنه بير-بير آچيلدي.
صاباحين کتخودا قوللوق يئتيردي،
خبر احمد حرامي`يه گتيردي.
دئدي: خوجا، ياراقلانين گئده ليم،
بويور نه قوللوغون وارسا ائده ليم.
آتا آتلانيب اول ايکي كؤنولدو،
گؤره ليم بو نصيب کيمه سونولدو.

توکه لي آرماغينين آلدي، واردي،
شهنشاه ائشييينده گلدي، دوردو.
همن دم کتخوداسي گيردي شاه`ا
دئدي بير-بير بونو اول پاديشاه`ا.
توکه لي وصفي شاه`ا، قيلدي معلوم،
اوخونوز اونو دئدي شاه-ي مختوم.
گؤره ليم کيمدورور، نه خوجادير اول
کي، منيم عئشقيمه چکميش تليم يول.
چيخيب اول کتخودا آلدي و گلدي،
گؤروب سولطان حرامي`يي شاد اولدو.
الين اؤپدو شاه`ين احمد حرامي،
تليم لوطف ايله سؤيله دي کلامي.
بيليكلرين بوتون عرض ائتدي شاه`ا
ايکه ن خوش گلدي غايت پاديشاه`ا.
دئدي گرچي سيزه زحمتلر اولدو،
ولاکين بيزلره راحتلر اولدو.
دئدي احمد حرامي شاه`ا: موطلق
يئر ائتدي عئشقينيز جاندا موحققق.
سنين عدليني، اينصافين ائشيتديم،
كؤنولده مئهريني جاندا ايش ائتديم.
ديله ره م کي، دورام قاپيندا من ده،
تليم قول[لار؟] قاپينيزدادير بنده.
قاتي موشتاق ايديم ارديم قاپيندا،
كؤنولدن قول يازيلديم اوش تاپيندا.
بيحمديللاه بو گون قاپينا ارديم،
سنين دؤولتلي اوزون، شاها، گؤردوم.
چون اونو گؤردو شاه خولقييله سؤيله ر
سخا-و لوطف-و عدلين شرح ائيله ر.
قولاق ووردو، قاپيلدي سؤزلرينه،
نه بيلسين شاه اونون بو سيرلري نه؟!
شونون کيمي يئر ائتدي شاه`ا اول ار
گئچيردي يانينا، ائديندي سرور.
كؤنولدن عئشق ايله کئي سئودي جاني
قوماز يانيندان ائرته گئچه اونو.
کيشي كؤنلونده کين، کيشي نه بيله،
نه وار ايچينده، مگر فيتنه قيلا.
بير-ايکي گون بونون اوستونه گئتدي،
شهنشاه گؤر نئجه بير تدبير ائتدي.

وزيرلري ايله بير گون دانيشدي،
دئدي: شو خوجا عئشقي منه دوشدو.
بو دنلي کي کرملر قيلدي منه
قيزيمي وئريره م شوکرانه اونا.
منه بير قول-قانات اولسون، اوتورسون،
ائلينه گئتمه سين، منيمله دورسون.
وزيرلر مصلحت گؤردو سؤزونو،
ولي بيلمه ديلر معني اوزونو.
دئدي سولطان کي: من بيلمه ز اولايين
اونا سؤيله ن، نه دير فيکري بيله يين.
موبارک دويون ائديب باشلاياووز،
اونا گؤره ايشيميز ايشله يه ووز.
بونون کيمي دانيشيق ائيله ديلر
مگر بير گون وزيرلر سؤيله ديلر.
دئديلر: خوجا، سوردو سني سولطان،
کي، سندن گؤردو اييليک، موروت، ائحسان.
قيزين ايسته يه ليم، آلماق روا مي؟
حلالين، خاتينين اولماق روا مي؟
دئدي احمد حرامي: قاتينيزا
قول اولوب دوراييم حضرتينيزه.
نه کيم شه دئر ايسه، من اونا فرمان،
نئچون يوخ دئيه وه ن نه کيم دئسه خان.
قول اولدوم، گئتمه زه م قاتيندان آيريق،
موطيع`ه م منه بويورورسا بويوروق.
حرامي`نين خود ايسته دييي اولدو،
فلکده ايسته دييين يئرده بولدو.
جاوابيني اونون چون آلدي بونلار،
گئنه سولطان قاتينا گلدي بونلار.
نه کيم احمد حرامي دئدي شاه`ا،
قامو عرض ائيله ديلر پاديشاه`ا.
سئويندي، آيدير؛ ايمدي نئيله يه ليم
هله بير قيزا دخي سؤيله يه ليم.
نه تورلودور اونون كؤنلو، گؤره ليم
بس اوندان بو ايشه بونياد ووراليم.
بير-ايکي خاص خاديملر[دن] دورورلار [دريرلر؟]،
دوروبان [دريبه ن؟] شاه قيزينا گؤنده ريرلر.
ساراييندا خاديملر دورموش ايدي
خاديملر هم قاپييا وارميش ايدي.
مگر خاديملري بير دايه گؤردو،
خبر اول دمده گول اندام`ه وئردي.
دئدي ياقوت-و گؤوهر لالا: ائي جان
دورور قاپيدا، ايسته ر گيره فرمان.
دئدي اول دايه يه اول دم گول اندام،
نئچون قيلير ائشيکده اونلار آرام.
آلين گلين اولاري، دئر گؤره ييم،
نه يه گلدي، خبرلرين سوراييم.
هزاران عوذريله اونلار اوتوردو
شولوق دم ماحضر نئعمت گتيردي.
بولار خونو يئييب، شوکر ائيله ديلر
دوعا قيليب، بو سؤزو سؤيله ديلر.
دئدي مرجان لالا: ائي شوخ-ي شنگول
کي، سنسين جننتين باغيندا بير گول.
آتان وئريب ايدي بيز قوللاريني
خزاندان ساخلاسين حاق گوللريني.
شول اولو خوجا کي گلميشدي بوندا
قاتي حؤرمتليدير آتان قاتيندا.
آتانيز سيزي اونا وئريبه ن دئر
قوزوم دخي نه دئر، بير گؤره يين دئر.
بودورور دانيشيغي گئجه-گوندوز
روا گؤردو اومودو دخي دوپدوز.
بويور سن دخي نه دئرسين گؤره ليم،
خبر وئر بيزه شاها ده ييره ليم.
گول اندام بو سؤزو بير-بير ائشيتدي،
اؤزونه عاغليني بير-بير ايش ائتدي.
آيتدي: نه عجب سؤز سؤيله دينيز،
مني بوندا قاتي دنگ ائيله دينيز.
جاهاندا يوخ مودور بير شاهزاده
کي، وئريرلر مني بير خويراته.
نيته روا گؤرور هئچ اونو باري
کي، بير شاهين اولا قارقا شيکاري.
بو نه سؤزدور کي، سؤيله رسيز قاتيمدا
ووقاريم يوخ مودور غئيري قاپيمدا.
بولار آيدير: ائ محبوب-ي زمانه،
ايگيده کيمسه بولوماز بهانه.
قاغان آسلان کيمي ياخشي ايگيتدير.
گؤزه لدير صورتي، نقشي ايگيتدير.
اوزو گؤيچه ک، يئرينجه عاغلي کاميل،
مين آرتيق قول-قاراواش کندينين بيل.
گول اندام دئدي کي، ائي لالا، دينله
سؤزومه گؤره بير ايش ائت کي، آنلا.
خبر وئر آتاما کيم، اونو آلسين،
منيم کؤشکومه ياخين قارشي گلسين.
ايراقدان گؤسته رين اونو گؤره ييم
کي، من اوندان سيزه خبر وئره ييم.
بولار آلقيش ائيله دي، ايکرام ائتدي،
گول اندام`ين اليني اؤپدو، گئتدي.
گئري سولطان قاتينا اردي بونلار،
گول اندام خبريني وئردي بونلار.
گله ليم بيز گول اندام`ين سؤزونه،
نه دير حالي، نه دير فيکري، سؤزو نه؟

هزاران تورلو انديشه ائديردي،
مودام فيکري حرامي`يه گئديردي.
دئر ايدي کيم، بولاري قيرميش ايديم،
بيرين اؤلدورمه ييب قورتارميش ايديم.
عجبدير بو خوجا دئييل ايسه اول،
مودام سريمده بودور آچيلان يول.
بو فيکر ايله يئدي غوصصه نيگارين،
کيشينين کيم بيلير كؤنلونده وارين.
گئچيبه ن اول گئجه چون صوبح اولدو،
دوروب احمد حرامي، شاه`ا گلدي.
چو گلدي پاديشاه`ين حضرتينه
روان سولطان سووار اولدو آتينا.
بيله احمد حرامي ميندي آتا
قيزين کؤشکونه ياخين گلدي آتا.
بيريسي گلدي خاديملرين اوندا،
اونو گؤسته رديلر اول خون-ي باختا [؟].
اه ييليب، باخدي کؤشکونون تاشيندان
بيلير اونو شولوق دم جونبوشوندن.
دئدي: بونو منه زينهار، گرکمه ز.
کيشي کندي جانين اودا بيراخماز.
اگر آتام مني بونا وئريرسه،
حلال اولسون قانين، کيم اؤلدورورسه.
مني اونا وئريرسه حال دوشوار
کي، بو حالدا عجاييب تورلو ايش وار.
چو لالا بو سؤزو اوندان ائشيتدي
تليم عؤذور ايله گؤر نه ايش ائتدي.
دؤنوب دئدي: ايا مستور-ي عالم،
کي، سنسين جاهان ايچره خوب-ي عالم.
سيزه گلديييميز عئيب ائتمه يه سيز.
آتان حؤکمييله گلديک قاتينا بيز.
بونو دئدي و خاديم دوردو گئتدي،
گول اندام`ين سؤزون شاه`ا ايله تدي.
بو کز سولطان دوروب گلدي قيزينا،
قيزي قارشي وارير سولطان اوزونه.
گؤرور کيم، آتاسي گلير ياليقيز،
گلير ايللا ملول، خاطيري ياووز.
ملول گؤردو آتاسين، اولدو پورغم،
ايله ري ايودي، الين اؤپدو اول دم.
تليم عيززتله آلدي و گتيردي،
گئچيب، تخت اوستونه سولطان اوتوردو.
شهنشاه دئدي: ائي جانيم پاراسي
کي، سنسين گؤزومون آغي، قاراسي.
روا مي دير منيم سؤزوم سيياسين،
گرکمه ز اول اري منه، دئيه سين.
عياليمسين منيم سن، هم جانيمسين،
جييه ريمسين، داماريم، هم قانيمسين.
غرض بير بوشلوق ايسه بو زاماندا
نئچون ايستمه يه سين اونو سن ده؟!
ايراق يئره سني وئرير اولورسام،
منه (بير) درددورور سنسيز اولورسام.
سني بو ايگيده کبين ائده ¬م من،
اوزونو گؤره دورام دمبدم من.
سؤزوم يانليش اولور ايسه اوتانام،
عياليمسين، سنه ياووز مو سانام؟!
آتاسين دينله دي اول مئهريباني،
قيزاردي گول کيمي بنزي، اوتاني.
تري دور کيمي اوزونده دوزولدو،
گؤزو نرگيزلرين اول دم سوزولدو.
ياناغي گول کيمي اؤيله قيزاردي
آتاسيندان اوتانير، هم قيزاردي.
ادب بيرله دئر: ائي دؤولتلي آتا
سخاوت کاني، ائي موروتلي آتا.
سيزه بيز قارشي سؤيله مک عئييبدير،
اولولار بو سؤزو بؤيله دئييبدير.
بيزه سؤز سؤيله مک دوشمه ز قاتيندا
همن قوللوق گره کدير حضرتينده.
نه دئيه يين، آتا، فرمان سنيندير،
اگر دردلي ايسه م درمان سنيندير.
قيزيندان چونکو سولطان دينله دي سؤز،
دوعا قيلدي و دئدي: ائي گؤزه ل اوز.
هزاران تورلو اونا آلقيش ائتدي،
اسه نله دي قيزيني دوردو، گئتدي.

آتاسي گئديجه ک، آرتيردي دردين،
بو سؤزون سانما کيم اولايدي سردين.
ملول، غمگين قاليبان اول نيگارين
ساراردي گول اوزونون نؤوباهارين.
دريغا، گؤر آتام منيمله نئتدي،
اليم آلدي، مني يابانا آتدي.
گول اندام`ين ديگرگون اولدو حالي،
حرامي`دير دونو، گونو خيالي.
ياتير اول گئجه غمگين زار-و تنها،
ايچيندن گئچيرير نه سؤز، نه قاوقا.

چو صوبح اولدو يئرينده دوردو سولطان،
اوخودو به يلريني، دردي اول خان.
دويون ساچيسينا گلدي اولولار،
اکابيرلر، اميرلر، يکتولولار [بك و اولولار؟].
قامو به يلر گلير، اوندا اريشير،
دويون اوچون ياراق ائديب، دوروشور.
گله ن خالقي يئديردي، تويلادي خوش.
تامام قيرخ گون دويونو ائيله دي خوش.
عجاييب تورلو-تورلو نئعمت-و خون
يئديلر قورت-و قوش، قالمادي مغبون.
گوموش، آلتيندي تپسييله چاناقلار،
دولو-دولو ايچي نئعمت تاباقلار.
هريسه، قه يله-و دانه، توتورقان
قوش اتلرييله قويون، جومله بوريان.
چو دويون ساوولوب، آخيرا اردي،
حرامي اول گئجه گرده يه گيردي.

ائشيت ايمدي بو ياندان [سن] عجبلر،
ائشيده نلر اونو ياولاق عجبله ر.
گول اندام`ين مگر بير رازداشي
وار ايدي، خوش ايدي اونونلا باشي.
گؤزه ل بير قيزدورور کندييه مانند
سئچيلمه ز بير-بيريندن، سؤزلري قند.
بير آلما سانا ايدين اؤزلريني،
گؤره يدين ماه-ي تابان اوزلريني.
بيري-بيرينه بنزه ر ايدي موطلق
ياراتميش صونعي بيرله اونلاري حاق.
کوچوجوکدن بيله اولالميش ايدي،
گول اندام`ين خويونو آلميش ايدي.
گول اندام اونا بير-بير وصف-ي حالين
اوتوردو درديني، دئدي خيالين.
دئدي اول قيزا: گئت تئز، وار، دونان، گل،
منيم قايقيلاريمي يابانا سال.
منيم شکليم اولوبان، گرده يه گير،
سنينله آرادا اولسون بو تدبير.
ساقين بو رازي کيمسه يه دئمه گيل،
بو سؤزو کيمسه يه فاش ائيله مه گيل.
دئدي اول قيز: ائ محبوب-ي زامانيم،
فدا اولسون يولوندا دادلي جانيم.
باشيم اوستونه، نه کيم بويورورسان،
سؤزوندن چيخمايام گر اؤلدورورسه ن.
واريب قيز دونانيب، گلدي اوتوردو،
بولار بو فيکريله نه ايش بيتيردي.
قاچان کيم اول دؤشه ک واختي اولوردو،
دونانيردي، اول ايشه قيز گليردي.
گول اندام يئرينه اول قيز واريردي
چو حاشا! جارييه واريب گؤروردو.
نيته کيم اول گئجه اولوردو حاجت،
قيز ايله اولور ايدي اول حيکايت.
تامام بير ايل بو رسمه واردي بو ايش
بونون اوستونه گئچدي بو ياز-و قيش.
گؤرون بو چرخ-ي غددارين ايشيني،
بو مککارين گل آنلا جونبوشونو.
قيزا بير گون اريشدي امر-ي تقدير
کي، پوزولدو بو اوزدن راي-ي تدبير.
گول اندام قيلدي شؤيله زار-ي تنها
ملامت ايچره قالدي دنگ-ي شئيدا.
ائشيندن آيريليب، حال اولدو دوشوار
دئر ايدي: قاني اول يار-ي وفاکار.
چو ياخدي هيجر اودونا کندؤزونو
حاق`ا ايسمارلادي اول دم اؤزونو.
ديليني توتدو، ابسمجه ک اوتوردو
وفاسي يوخ جاهانين، چونکو گؤردو.
گله ليم بو اوچونجو مجليسه بيز
خبريمدن ائشيدين چون خبر سيز.

مجليس – 3

مگر احمد حرامي بير گون آزدي،
گؤرون کيم، خاطيرينده اول نه دوزدو.
شهنشاه`ا دئر: ائي به يلر به يي، سن
جاهان ايچينده داييم اولگيل اسه ن.
تليم نئعمتلرين خوش يئديم، ايچديم،
تليم عيشرتلر ائتديم، شادي گئچديم.
يامان گون گؤرمه ديم هرگيز قاتيندا،
اؤزوم ياخشي گئچيرديم حضرتينده.
ولي بير حاجتيم وار سؤيله يه م من
بو گون حالي سيزه شرح ائيله يه م من.
ماليم، مولکوم منيم چوخدور قيريم`دا
اؤکوش گنج-و خزينه م وار يئريمده.
ايجازت من قولونا وئر گئده ييم،
واريبان، اونلاري هپ جمع ائده ييم.
شهنشاه آييدير کيم، دستور وئره ييم،
اؤته نه واخت گليرسين [من] بيله ييم.
آيتدي [کيم] اگر ديري قاليرسام،
بوچوق ايل اه يله نه م، گر چوخ اولورسام.
بوچوق ايل مونتظير اولون بيزه سيز،
تاپينا آلتي آيدا اره ووز بيز.

چو بد فئعل و ابتر دستور آلدي،
گول اندام`ين قاتينا سوردو، گلدي.
دئدي کيم، ائي منيم، ياريم، نيگاريم،
وفاداريم، حلاليم، غمگوساريم.
آتاندان دستور آلديم شاه-ي شنگول،
قيريم`ا گئتمه يه، ائي اوزو گول، گول.
قاپيندان آيري منه گون گرکمه ز،
بشارت، شادليق-و دويون گرکمه ز.
چون اولدوق سن و من، معشوق-و عاشيق
بولونماز دونيادا بير يار-ي صاديق.
کرم ائيله، سؤزومدن چيخما، ائي دوست،
مني حسرت اودونا ياخما، ائي دوست.
بيله گل گئده ليم بو قوتلو يولا
اولا کيم تانري خئيرين وئرميش اولا.
گول اندام آيتدي: ائي منيم حلاليم،
تاپيندير باغچا-و مولک ايله ماليم.
نه کيم سيز بويورورسوز، خئير اگر شر،
اونو توتماق يئرينجه بيزه دوشه ر.
آغالار دئدييين توتماق گره کدير،
آغي سونار ايسه، اودماق گره کدير.
اينانيب سؤزونه اول ماه پئيکر
ييديلديم [؟] سؤزيغه [؟]، دئدي، ائ سرور.
آتاسييلا، آناسييلا گؤروشدو،
بو کز گئتمه يي ياراغينا دوشدو.
دئدي كؤنلوندن اول کافير دئييل بو.
عجب مي گئتسه ديلدن اول ياووز خو.
نئجه بير کين توتا، ترک ائتدي اولا،
ايچيندن کيبري، کيني گئتدي اولا.
او دادلي سؤزلره كؤنلو قاپيلدي
اوره يي تازه له ندي، سو سپيلدي.
گلير باشينا نه کيم يازسا تقدير،
آدام دئدييي اولماز جومله تدبير.
قيلان بو ايشلري جومله خودا`دير،
اگر قودرتدورور، اگر قضادير.
نيگارين نابکارا اولدو چون صئيد،
دوزه ر احمد حرامي يول اوچون قئيد.
همن بير قيرناق آلدي و ايکي قول،
گؤروشدو شاه ايله، توتدو همن يول.
گول اندام`ي آليب، گئتدي ايشينه،
گؤرون نه گليسه ر اونون باشينا.

چو بونلار اولدولار يولا روانه،
قولاق وور بيللاهي بو داستانه.
اره رلر ايصفاهان شهرينه بير گون،
بيله سينجه گول اندام خوب-و مووزون.
قودو احمد حرامي اوندا رختي
اول ايکي قولو، قيرناغي بيراخدي.
گول اندام`ي ياليقيز آلدي گئتدي،
ائشيت ايمدي حرامي اوندا نئتدي.
گؤزه تمه دي ساغيني و سولونو،
همن اول توتدو گورجوستان يولونو.
گول اندام`ين اوزونه باخماز ايدي،
كؤنول عئشقينه هرگيز ياخماز ايدي.
اونون ايله ياخينليق ائتمه ز ايدي،
زيرا کيبير ايچيندن گئتمه ز ايدي.
هنوز بيکيردي اول خوب-ي زمانه
نصيب اولمادي قيز اول قالتابانا.
سؤزو سؤيله ييجه ک سرت سؤيله ر ايدي،
فساد ائتسه كؤنولدن ائيله ر ايدي.
اونون جونبوشونو گؤردو گول اندام
بو معني سيررينه اردي گول اندام.
دئدي کندؤزونه : آه نئيله ديم من،
آغييي گؤز گؤره نوش ائيله ديم من.
نه دن قورخاريسام اونا ساتاشديم،
سمندر کيمي اودلارا توتاشديم.
تليم فيکر ائيله ييب، غمگين گئده ردي،
آنيب شهزاده لييين آه ائده ردي.

حرامي اوندا قوندو بير دره يه
کي، اينسان اوغرامازدي اول آرايا.
گول اندام`ا دئدي: دؤوشور اؤگونو
بيليرميسين منه سن ائتديييني؟
آديم دئييل مي دير احمد حرامي؟
هاني يولداشلاريمين اينتيقامي؟
اره نلره قيليج وورماق نئجه دير؟
اوغورلايين ايگيت قيرماق نئجه دير؟
سنه گؤسته ره ييم بير-بير بو گون من،
اگر گؤسته رمه ز ايسه م، ار دئييله ¬م
ايش ائده ييم سنه عالمده دوپدوز
کي، اونون کيمي ايش هئچ گؤرمه ميش گؤز.
گول اندام آيدير: ائي شؤهرت-ي آفاق،
اگر سوچلو ايسه م، سن تانري`يا باخ.
اره نلرين ايشي موروت دئييل مي،
بو گون دونيا، يارين آخرت دئييل مي؟!
ائشيتديم من سني بيزه ارينجه ک،
سنين هر تورلو جوراتين گؤرونجه ک.
آتاما سيرريني فاش ائتمه ديم من.
خزينه آچديغين [فاش؟] ائتمه ديم من.
ديله رديم منيم ايله يار اولايدين،
نه بيليرديم بئله اغيار اولايدين.
هله موروتينه نه سيغسا ايشله
گره ک اؤلدور، گره ک جانيم باغيشلا.
حاق`ا سالديم، گؤره ييم حاق نه ايشله ر،
بونون کيمي باشا چوخ گلير ايشلر.
گول اندام`ين سؤزونو آلمادي هئچ.
زئهي ظاليم عئينينه گلمه دي هئچ.
يانيندان دؤرد دمير قازيق چيخاردي
شهنشاه`ين قيزين چارميخا گردي.
دؤکودو [دؤيه به ن؟] دؤرد قازيق، دؤرد يانا مؤحکم
زئهي جؤور-و جفادير، زئهي سيتم.
گول اندام`ي اليندن، آياغيندان،
سارار مؤحکم، چکه ر باغلي باغيندان.
دئدي: سنه دخي گؤر نئده ريم من،
هله داغا اودونا گئده ريم من.
بودور قصديم، سني اودا ياخام من
ايراقدان خوش تاماشانا باخام من.
بير آتا ميندي، بيريسيني يددي،
واريب داغدان اودون آلماغا گئتدي.

گول اندام قالدي اول افغان ايچينده،
فغان-و زار ائديب گيريان ايچينده.
ساناسين کيم، خزان ياپراغي دوشدو،
و بير تر گول سولوب توپراغا دوشدو.
نه لر قيلير گؤرون بو چرخ-ي غددار،
قيلير درده نئجه لري گيريفتار.
گول اندام کندي بيرله سؤيله نيردي،
حاق`ين بيرليييني ذيکر ائيله نيردي.
دئدي کي: ائي کريم-ي کارسازا
خوداوند-ي قديم-و بينييازا.
مدد، (دينله) سؤزوم، مدد خودايا،
ايلاهي، دفع وئر[گيل] بو قضايا.
يورور ايکن طاووسبال باغ ايچينده
بوغولدوم، قالديم اوش ايرماق ايچينده.
بونو دئدي، خودا`يا توتدو اوزون
بو شئعري باشلادي، سن دينله سؤزون.
اينيلتي ايله بير کز ائيله دي آه،
آيتدي: سنه سيغينديم، آي آللاه.

يالواريش

گؤرون ايمدي منه نئتدي زمانا،
اليمي آلدي، اوش آتدي يابانا.
نه دير بونجا منه جؤور-و جفالار،
مگر کيم قهر اوچون بسله دي آنا؟
سوچوم نه دير، عجب نئتديم، نه قيلديم،
قارا باغريم منيم غرق اولدو قانا.
هنوز دخي قيزيل گول قونچاسيندان
آچيلمادان نه تئز دؤندو خزانا.
جفا ايميش بو دونيانين وفاسي
کي، مين ياخشي ايشي ده يمه ز يامانا.
گؤرون بو چرخ-ي گردونو کي، مني
ساپانا قويوبان آتدي يابانا.
ايلاهي، دوشموش احوالين بيله ن حاق،
سنه سيغينديم، ائي حه ييي-ي توانا.

بونو سؤيله ر ايدي، زاري قيلاردي
گهي عاقلي گئده ردي، گاه گله ردي.
شو رسمه کيم، قيليردي آه-و افغان
گؤزوندن ياش يئرينه تؤکولور قان.
اول ايقليملر ايسيزليق اولموش ايدي،
کيمه سنه اوغراماز، دويولموش ايدي.
حراميدن او يول ايشله مه ز اولدو،
او يولدان کاريوان کسيلدي، قالدي.
ولي حاق تانري`نين لوطفو تليمدير،
کريمدير-و رحيمدير-و عظيمدير.
مگر بير قافيله يول آزميش ايدي،
گونون ايکي اولوسو گئچميش ايدي.
وار ايدي بونلارين ايچينده بير ار
قاتي گوربوز، باهادير ايدي، سرور.
آتي يؤگروک ايدي، کندي ياراقلي،
اوره کلي ايدي اول، گؤزو چيراقلي.
ختايي ياي الينده، اوخ دولو کيش،
باهاديرليق اونا اولموش ايدي ايش.
گئديب اؤنجه قاراوول اولموش ايدي،
آدينا خوجا روستم دئرلر ايدي.
قولاق ووروب نيگارينين سؤزونه
روان سالقيني آلدي اوموزونا.
نه يي کي دئييبه ن بلينله يؤره ک
گليردي چئوره يانين دينله يه ره ک.
بير آدمدير کي، جاني يوخ ايچينده
گول اندام`ي گؤرور چارميخ ايچينده.
گؤرور کيم، خصمي گئتميشدير قاتيندان
شولوق دم آتلاييب اندي آتيندان.
گول اندام`ين قاتينا گلدي، سوردو
گول اندام، حالين اونا آيديوئردي.
غريبه م دئدي بو ائلده، سوچوم يوخ،
بو چرخ-ي دون منه جؤور ائيله دي چوخ.
ايگيت چون بير-بير ائشيتدي سؤزونو
حاق`ا ايسمارلادي اول دم اؤزونو.
اونون شئشدي اليني، آياغيني،
توکه لي گئده رير بند-ي باغيني.
آتينين آردينا آلدي نيگاري،
حوري اوزلو بشر، اول گولعوذاري.
يوگوروبه ن اره ر يولداشلارينا،
دئدي احوالي اول حالداشلارينا.
قاچان يولداشلاري قيزي گؤرورلر،
قاموسو قورخوبان جاندان گئچيرلر.
اوشه نيرلر، حرامي دويا دئرلر،
گله بيزي قيرا و سويا دئرلر.
ايگيت آيتدي: اوشه نمه ن، قورخو يئمه ن،
بيزه قارشي حرامي دورا دئمه ن.
دئدي کي، من بونو قارداش ائدينه م،
وئره م بير ايگيده، يولداش ائدينه م.
اورالاردان بولار دورمادي، گئتدي
ائشيت ايمدي حرامي اوندا نئتدي.

ايکي آت يوکو اودون واريب آلدي،
گول اندام`ي اودا وورماغا گلدي.
گلير گؤرور يئريندن گئتميش اول قيز،
سووار اولدو آتينين بيرينه تئز.
يولا گيردي، ايزين چالدي بولارين
قيزي آليب گئده ن اول خوجالارين.
جانينا اود دوشوب، سانکي قودوردو،
ساقالين يولدو، کؤکسونو چوخ ووردو.
يوگوردو آتيني، مهميزه ووردو
بولارين ايزلرين گؤزه تدي، گؤردو.
ايراقدان حرامي`يي گؤردو اونلار،
دانيشدي بير-بيرييله، دوردو